ARTIGO 1.- FEITO IMPOÑIBLE.

1. 1. O Imposto sobre Construcións, Instalacións e Obras é un tributo indirecto cuxo feito impoñible está constituído pola realización, dentro do termo municipal, de calquera construción, instalación ou obra para a que se esixa obtención da correspondente licenza de obras ou urbanística, teñan ou non a devandita licenza, ou para a que se esixa presentación de declaración responsable ou comunicación previa, sempre que a expedición da licenza ou a actividade de control corresponda ao concello da imposición.
2. 2. As construcións, instalacións, ou obras ás que se refire o apartado anterior poderán consistir en todos aqueles actos suxeitos a licenza segundo o previsto na Lei de Ordenación Urbanística e Protección do Medio Rural de Galicia, en particular:
   1. a) Obras de nova planta e ampliación de construcións existentes.
   2. b) Obras de modificación ou de reforma tanto as que modifiquen a disposición interior como o aspecto exterior.
   3. c) Instalación de rótulos e letreiros.
   4. d) Peche de terreos.
   5. e) Obras en cemiterios.
   6. f) Obras e instalacións industriais.
   7. g) Calquera outra construción, instalación ou obra que requira licencia urbanística.

ARTIGO 2.- SUXEITOS PASIVOS.

1. 1. Son suxeitos pasivos deste imposto a título de contribuíntes, as persoas físicas ou xurídicas e as entidades ás que se refire o artigo 35.4 da Lei 58/2003, do 17 de decembro xeral tributaria, que sexan donos das construcións, instalacións ou obras, sexan ou non propietarios dos inmobles sobre os que se realicen aquelas.

   A estes efectos, terá a consideración de dono da construción, instalación ou obra quen soporte os gastos ou custos que supoña a súa realización.

2. 2. No caso de que a construción, instalación ou obra non sexa realizada polo suxeito pasivo contribuínte terán a condición de suxeitos pasivos substitutos do contribuínte quen soliciten as correspondentes licenzas ou presenten as correspondentes declaracións responsables ou comunicacións previas ou quen realicen as construcións, instalacións ou obras.

   O substituto poderá esixir do contribuínte o importe da cota tributaria satisfeita.

3. 3. Os substitutos do contribuínte están obrigados a cumprir todas as obrigas tributarias relativas a este imposto incluída a de efectuar o ingreso das cotas en Arcas Municipais de conformidade co disposto no artigo 32 da Lei xeral tributaria.
4. 4. Nas solicitudes de licenza deberá constar especificamente, nome, DNI ou CIF e domicilio fiscal do dono do terreo, do dono das obras e da empresa construtora (1) .

⁽¹⁾ En relación con esta última, en caso de non estar designada, achegarase no momento da súa designación (artigo 2.2 da Ordenanza reguladora das taxas de licenza).

ARTIGO 3.- EXENCIÓNS E BONIFICACIÓNS.

1. 1. Está exenta do pagamento do imposto a realización de calquera construción, instalación ou obra da que sexa o dono o Estado, as Comunidades Autónomas ou as Entidades Locais, que estando suxeita ao mesmo, vaia a ser directamente destinada a estradas, ferrocarrís, portos, aeroportos, obras hidráulicas, saneamento de poboacións e das súas augas residuais, aínda que a súa xestión se leve a cabo por Organismos Autónomos, tanto se se trata de obra de investimento novo como da súa conservación.
2. 2. Decláranse “de especial interese ou utilidade municipal” e gozarán dunha bonificación do 95% na cota do Imposto, de conformidade co artigo 103.2 a) do RDL 2/2004 as construcións, instalacións e obras realizadas sobre edificacións existentes, por iren destinadas ou implicar a eliminación de barreiras arquitectónicas. Esta bonificación aplicarase de forma exclusiva sobre o importe da cota que resulte de multiplicar o presuposto de execución material das obras especificamente destinadas á eliminación de barreiras arquitectónicas polo tipo impositivo.
3. 3. Decláranse “de especial interese ou utilidade municipal” e gozarán dunha bonificación do 95% na cota do imposto, de conformidade co artigo 103.2 a) do RDL 2/2004 as construcións, instalacións e obras que realizadas pola Consellería de Educación e Universidades en ou para establecementos educativos que figuren ou vaian a figurar no inventario de Bens do Concello.
4. 4. Decláranse “de especial interese ou utilidade municipal” e gozarán dunha bonificación do 50% na cota do Imposto, de conformidade co artigo 103.2 a) do RDL 2/2004 as construcións, instalacións ou obras destinadas ao desenvolvemento das actividades que tributan no Imposto de Actividades Económicas nos epígrafes 416.1 e 416.2: Fábrica de Conservas de Pescado e outros produtos mariños, 612.8: Comercio Maior de Pescados, Crustáceos, Moluscos e outros, 643.1: Comercio Menor de Pescado e outros Produtos da Pesca, Grupo 361: Construción e montaxe de vehículos automóbiles e os seus motores, Grupo 362: Construción de carrocerías, remolques e volquetes, Grupo 363: Fabricación de equipo, compoñentes, accesorios e pezas de reposto para vehículos automóbiles, Grupo 371: Construción Naval e Grupo 372 Reparación e e mantemento de buques.
5. 5. Decláranse “de especial interese ou utilidade municipal” e gozarán dunha bonificación do 75% na cota do Imposto, de conformidade co artigo 103.2 a) do RDL 2/2004 as construcións, instalacións ou obras incluídas nos Plans Especiais de Protección e Reforma Interior de Bouzas e Casco Vello, así como nos edificios catalogados do PEEC, e nas Áreas de Rehabilitación Integrada.

   Inclúense na Declaración de especial interese ou utilidade municipal con bonificación do 75% na cota no imposto ás ARIs de Casco Vello de Vigo, Bouzas, Santa Clara (Cabral), Bueu-Moaña (Coia), Beiramar, Espiñeiro (Teis), San Pablo e San Roque, e nos Contornos Residenciais de Rehabilitación Programada (ERRP) de Casco Vello, Bouzas, Santa Clara, Coia, Beiramar, Espiñeiro-Teis, San Pablo, San Roque, A Salgueira, descontinuo de Alcalde Lavadores, Canicouva e Escolas Públicas, Fenosa e O Gorxal.

6. 6. Decláranse “de especial interese ou utilidade municipal” e gozarán dunha bonificación do 95% na cota do Imposto, de conformidade co artigo 103.2 a) do RDL 2/2004 as obras de reforma ou acondicionamento daquelas vivendas que sexan destinadas a alugueiro social e que conten con financiamento ou protección pública.
7. 7. As obras, construcións e instalacións necesarias para a posta en funcionamento dun proxecto empresarial de interese municipal (PEIM) entenderanse de especial interese por concorrer a circunstancia de fomento de emprego e gozarán dunha bonificación na cota deste imposto do 50%, de conformidade co disposto no artigo 103.2 a) do RDL 2/2004 . Os suxeitos pasivos deste imposto aportarán coa solicitude da Licencia de Obras o correspondente acordo da Xunta de Goberno Local onde se cualifica a actividade como proxecto empresarial de interese municipal (PEIM).
8. 8. Gozarán dunha bonificación do 50% da cota do Imposto as construcións, instalacións ou obras referentes a vivendas de protección oficial. Os solicitantes aportarán, xunto coa autoliquidación do Imposto, a correspondente cédula de cualificación de protección oficial e aplicarán directamente a bonificación, sen prexuízo da comprobación administrativa
9. 9. Gozarán dunha bonificación do 30% sobre a cota, as construcións, instalacións ou obras consistentes na instalación de sistemas para o aproveitamento térmico ou eléctrico da enerxía solar para autoconsumo. Non obstante, para o caso de construción de uso residencial, a porcentaxe de bonificación ascenderá ao 95%. A aplicación desta bonificación estará condicionada a que se acredite que os colectores ou captadores dispoñen da correspondente homologación da Administración competente. Non se concederá esta bonificación cando a implantación destes sistemas sexa obrigatoria a tenor da normativa específica na materia.

   Esta bonificación alcanzará exclusivamente á parte de cota correspondente as construcións, instalación e obras destinadas estritamente a dito fin. Para gozar da bonificación, deberase aportar pola persoa interesada un desglose do presuposto no que se determine razoadamente o custo que supón a construción, instalación ou obra á que se refire este presuposto.

10. 10. Decláranse, “de especial interese ou utilidade municipal” e gozaran dunha bonificación do 95% na cota do imposto de conformidade co artigo 103.2 a) do RDL 2/2004 as obras de reparación, rehabilitación ou reforma a realizar na vivenda habitual de persoas que pola súa capacidade económica resultaren exentas da taxa de lixo vivenda de conformidade co disposto na ordenanza fiscal nº16.
11. 11. Fora dos supostos enumerados nos apartados 2 a 8, e cando concorran razóns do artigo 103.2 a) do RDL 2/2004 , poderán declararse outros supostos como “de interese ou utilidade municipal”.

    A “declaración de interese ou utilidade municipal” regulada neste apartado corresponderá ao Pleno da Corporación por maioría simple e fixará a contía da bonificación. A tal fin, de oficio ou a instancia de parte, deberá solicitarse do Pleno da Corporación a “declaración de interese ou utilidade municipal”, argumentando os motivos de dita solicitude.

    As bonificacións reguladas nos apartados 2 a 9 teñen carácter rogado e deberán ser solicitadas polos suxeitos pasivos do imposto.

    A solicitude deberá realizarse unha vez concedida a correspondente licencia de obra e dentro do prazo previsto para a presentación da correspondente autoliquidación do imposto.

    A solicitude irá acompañada de copia da licencia de obra e presuposto desglosado das construcións, instalacións ou obras, ou daquela parte das mesmas, para as que se solicita a “declaración de especial interese ou utilidade municipal”.

    Presentada a solicitude en prazo, o suxeito pasivo poderá practicar autoliquidación do imposto aplicando a bonificación solicitada de forma provisional e condicionada á resolución que a outorgue, previa constatación do cumprimento dos requisitos.

    A tal fin, incorporarase informe técnico do departamento de Licencias en relación as obras que supoñan efectivamente eliminación de barreiras arquitectónicas no caso das obras a que se refire o apartado 2 deste artigo.

    No caso das obras a que se refire o apartado 3, incorporarase informe favorable do departamento de Educación do Concello e informe do departamento de Patrimonio Municipal en relación á súa inclusión no Inventario de Bens do Concello.

    No caso das obras a que se refire o apartado 4 contará con informe técnico favorable do Departamento de Licencias relativo á expedición de Licencia de Actividades e Instalacións, así como alta no censo do IAE nos epígrafes obxecto da bonificación.

    No caso de obras a que se refire o apartado 5, informe favorable da Comisión de Seguimento do PEEC, Bouzas e Casco Vello.

    A “declaración de interese ou utilidade municipal” quedará automaticamente sen efecto, sen necesidade de novo acordo en contrario, no suposto de que as obras que se realicen non se axusten á licencia concedida, así como no caso de caducidade da licencia. Notificarase á persoa interesada que a “declaración de interese ou utilidade municipal” queda sen efecto así como a conseguinte bonificación, a fin de que no prazo dun mes, aquel presente a correspondente autoliquidación complementaria. Transcorrido este prazo, sen que se produza a correspondente autoliquidación, o suxeito pasivo terá incorrido en infracción tributaria.

    As bonificacións previstas no presente artigo poderán aplicarse de forma simultánea e sucesiva segundo a orde en que aparecen reguladas.

ARTIGO 4.- BASE IMPOÑIBLE E DEVINDICACIÓN.

1. 1. A base impoñible deste imposto está constituída polo custe real e efectivo da construción, instalación ou obra, entendéndose por tal, a estes efectos, o custe de execución material desta.

   Non forman parte da base impoñible o Imposto sobre o Valor Engadido e demais impostos análogos propios de réximes especiais, nin tampouco as taxas, prezos públicos e demais prestacións patrimoniais de carácter público local relacionadas, no seu caso, coa construción, instalación ou obra, nin tampouco os honorarios de profesionais, o beneficio profesional do contratista nin calquera outro concepto que non integre, estritamente, o custe de execución material.

2. 2. A base liquidable deste imposto será idéntica á base impoñible.
3. 3. O imposto devindicarase no momento de iniciarse a construción, instalación ou obra, aínda cando non contase coa correspondente licenza.

ARTIGO 5.- TIPO IMPOSITIVO E COTA.

1. 1. O tipo de gravame será o 3,5%.
2. 2. A cota deste imposto será o resultado de aplicar á base liquidable o tipo de gravame.

ARTIGO 6.- XESTIÓN.

1. 1. O imposto esixirase en réxime de autoliquidación.
2. 2. Os suxeitos pasivos están obrigados a practicar autoliquidación en impreso habilitado ao efecto pola Administración Municipal, efectuando o pago previamente á retirada da Licencia concedida, en calquera entidade colaboradora autorizada, e, en todo caso, dentro do prazo máximo de un mes, contado a partir do momento en que lle fora notificada a concesión de dita licencia.

   No caso de obras en vivendas de promoción pública da titularidade do Instituto Galego da Vivenda e Solo, o prazo de ingreso será dun mes contado dende a notificación da adxudicación do contrato de obras e, en todo caso no prazo máximo dun mes dende o comezo daquelas.

3. 3. A autoliquidación presentada terá carácter provisional e determinarase a base impoñible do tributo, en función do presuposto achegado polas persoas interesadas, sempre que estivese visado polo Colexio Oficial correspondente; noutro caso, a base impoñible será determinada polos técnicos municipais, de acordo co custo estimado do proxecto.
4. 4. Nos casos en que o Plan Xeral de Ordenación Urbana de Vigo esixa para a posible concesión de licenza a presentación de proxecto visado polo Colexio Oficial, o suxeito pasivo estará obrigado a acompañar a autoliquidación, que deberá presentar para os efectos deste imposto, de fotocopia do presuposto de Construción, Instalación ou obra a realizar e DNI ou NIF do suxeito pasivo.
5. 5. No caso de que se modifique o proxecto e houbese incremento de presuposto, unha vez aceptada a modificación, deberá presentarse autoliquidación complementaria pola diferencia entre o presuposto inicial e o modificado con suxeición aos requisitos e efectos indicados nos apartados anteriores.
6. 6. Unha vez finalizadas as obras, no caso de que o seu custo real e efectivo sexa superior ou inferior ao que serviu de base impoñible nas autoliquidacións anteriores, os suxeitos pasivos presentarán no prazo dun mes, contando a partir do día seguinte á dita finalización, autoliquidación complementaria do tributo, positiva ou negativa, segundo proceda. Acompañaran certificado e presuposto final de obra visado polo Colexio Oficial correspondente, cando se esixiran direccións facultativas, e calquera outro documento que se considere oportuno.
7. 7. No caso de que non puidese presentarse o Certificado e Presuposto final de obra no prazo sinalado no número anterior, poderá solicitarse unha prórroga de un mes, contado a partir do día seguinte á finalización do prazo anterior, para a presentación da citada documentación.
8. 8. Á vista da documentación achegada e das construcións, instalacións ou obras efectivamente realizadas e do custo real e efectivo, o Concello, mediante a oportuna comprobación administrativa, modificará, no seu caso, a base impoñible, practicando a correspondente liquidación definitiva, e esixindo do suxeito pasivo ou reintegrándolle, no seu caso, a cantidade que corresponda, sen prexuízo das sancións que procedan, de acordo co disposto no artigo 6 desta Ordenanza.

ARTIGO 7.- INFRACCIÓNS E SANCIÓNS.

No relativo á cualificacións das infraccións tributarias así como á determinación das sancións que correspondan aplicarase o disposto na Lei Xeral Tributaria e restantes disposicións que a complementan e desenvolvan.