Capítulo 1. Condicións esixibles ás edificacións

Artigo 5. Concepto de edificación

Para os efectos de aplicación desta ordenanza, considéranse edificacións as construccións destinadas a calquera dos seguintes usos:

• Residencial privado, tanto vivendas colectivas como pegadas.
• Residencial público. Inclúe hoteis, asilos, residencias e demais establecementos hoteleiros.
• Administrativos e de oficinas.
• Sanitario. Inclúe hospitais, clínicas e demais centros sanitarios.
• Docente. Inclúe escolas, universidades e demais centros adicados á ensinanza.

Artigo 6. Condicións acústicas

1. As condicións acústicas esixibles ós diversos elementos constructivos que compoñen a edificación serán as determinadas no capítulo III da Norma básica de edificación sobre condicións acústicas.
2. De coexistiren nun mesmo edificio varios usos dos definidos no devandito artigo 5, aplicaranse as condicións acústicas da NBE a cada local por separado, e nos elementos constructivos de común unión entre varios locais aplicaranse as normas que supoñan a maior protección.
3. Exceptúanse os forxados do primeiro andar da edificación cando o mencionado andar sexa de uso residencial e na planta baixa poidan localizarse, conforme o planeamento, usos susceptibles de producir molestias por ruídos ou vibracións. Nestes casos, o illamento acústico a ruído aéreo esixible será de 55 dB (A).
4. Os aparellos elevadores, as instalacións de ventilación e acondicionamento de aire e as súas torres de refrixeración, a distribución e evacuación de augas, a transformación de enerxía eléctrica e demais servicios dos edificios serán instalados coas precaucións de colocación e illamento que garantan un nivel de transmisión sonora ós locais e ambientes próximos que cumpra co disposto no Manual de Procedementos para a Medición de Ruídos e Vibracións, anexo a esta ordenanza.

Artigo 7. Normas para evitar a transmisión de ruídos

Co fin de evitarmos no posible a transmisión de ruído a través da estructura da edificación, deberanse cumprir as seguintes normas:

1. Todo elemento con órganos móbiles manterase en perfecto estado de conservación, principalmente no que se refire á suavidade das súas rodaxes.
2. Non se permitirá a ancoraxe directa de máquinas ou soportes nas paredes medianeiras, teiros ou forxados de separación de recintos, senón que se realizará interpondo os axeitados dispositivos antivibratorios.
3. As máquinas de arranque violento, as que traballen por golpes ou choques bruscos e as dotadas con órganos en movemento alternativo estarán ancoradas en bancadas independentes, sobre o chan e illadas da estructura da edificación por medio dos adecuados antivibratorios.
4. Os conductos polos que circulen fluídos líquidos ou gaseosos en forma forzada conectados directamente con máquinas que teñan órganos en movemento disporán de dispositivos de separación que impidan a transmisión das vibracións xeradas polas ditas máquinas. As bridas e soportes dos conductos terán elementos antivibratorios. As aberturas dos muros para o paso das conduccións estarán dotadas de materiais antivibratorios.
5. Nos circuítos de auga evitarase a produción dos "golpes de ariete", e as seccións e disposicións das válvulas e billas haberán de ser tales que o fluído circule por elas en réxime laminar para os gastos nominais.

Artigo 8. Control do cumprimento

Coa correspondente certificación de fin de obra achegarase certificado expedido por empresa ou entidade homologada para estes fins, acreditativo do cumprimento das prescricións establecidas neste título. Sen o informe favorable sobre o cumprimento dos requisitos acústicos esixidos non se concederá a licencia de primeira ocupación ó edificio. A citada certificación pedirase para os edificios con licencia de obra solicitada con posterioridade á entrada en vigor da presente ordenanza. O procedemento para a homologación das empresas ou entidades habilitadas para emitir as citadas certificacións será o establecido no capítulo II do Regulamento de protección contra a contaminación acústica.

Capítulo 2. Condicións esixibles ás actividades relacionadas cos usos productivo, terciario e equipamento

Artigo 9. Ámbito

Todas as actividades industriais, comerciais e de servicios susceptibles de producir ruídos e vibracións quedan sometidas ó disposto neste capítulo. A produción e a transmisión dos ruídos e vibracións orixinados nas actividades anteriores deben axustarse ós límites establecidos no punto 1 do Manual de procedementos do Concello de Vigo para a medición de ruídos e vibracións, anexo a esta ordenanza.

Artigo 10. Obrigas dos/das titulares das actividades

As actividades que produzan unha perturbación por ruído ou vibracións someteranse ó procedemento de avaliación de incidencia ambiental.

Artigo 11. Contido dos proxectos

1. Na tramitación dos expedientes correspondentes a novas actividades e a ampliacións ou modificacións de importancia das existentes, esixiráselle ó proxecto un estudio xustificativo do cumprimento da presente ordenanza, sempre que a actividade sexa susceptible de xerar ruídos e/ou vibracións.
2. O citado proxecto conterá as seguintes determinacións:
   1. Descrición detallada do tipo de actividade e a natureza dos traballos para realizar, así como a maquinaria, instalacións e equipos cos que se vai contar para o seu desenvolvemento.
   2. Horario previsto para a actividade.
   3. Niveis sonoros de emisión da maquinaria e instalacións medidos a 1 metro e nivel composto resultante; na determinación deste tomaranse en consideración os niveis xerados no propio desenvolvemento da actividade. No seu defecto utilizarase o nivel sonoro reverberado estimado para a actividade, de acordo cos criterios da táboa 4 do Manual de procedemento para a medición de ruídos e vibracións, anexo a esta ordenanza.
   4. Nivel sonoro de inmisión permitido segundo as normas vixentes e horario de uso.
   5. Descrición do illamento acústico normalizado R en dB(A) que proporcionan a totalidade dos cerramentos do local, especificando composición do cerramento, clases de materiais utilizados, espesor destes en cm., masa unitaria en Kg/m² e separación entre follas. A determinación do illamento acústico R farase de acordo cos criterios establecidos na Norma básica da edificación de condicións acústicas nos edificios NBE-CA.
   6. Xustificación de que en función dos niveis de emisión considerados e as atenuacións conseguidas, se cumpre cos límites de inmisión tolerados no exterior do local, así como nas vivendas o locais lindantes ou máis próximos.
   7. Especificaranse medidas correctoras para o illamento de ruídos de impacto cando o illamento xeral se prevea insuficiente para este tipo de ruídos.
   8. Explicaranse detalladamente a montaxe dos materiais de illamento, especialmente o sistema de suxeición e a súa ancoraxe para evitar a formación de pontes acústicas.
   9. Illamento acústico normalizado R mínimo a conseguir entre a actividade e as vivendas lindantes co local, de acordo cos criterios da táboa 4, anteriormente citada.
3. Nos proxectos consideraranse as posibles molestias por ruídos que por efectos indirectos poidan ocasionarse nas inmediacións da súa implantación, co obxecto de propor as medidas correctoras adecuadas para evitalas ou diminuílas. Neste sentido, deberase prestar especial atención ós seguintes casos:
   1. Actividades para desenvolver en edificios onde exista tamén o uso de vivenda, no propio edificio ou nos colindantes ou máis próximos.
   2. Actividades que xeran tráfico elevado de vehículos, como almacéns, locais públicos e especialmente discotecas previstas en zonas de elevada densidade de poboación ou con rúas estreitas, de difícil manobra e/ou escasos espacios de aparcadoiro.
   3. Actividades que requiren operacións de carga e/ou descarga durante horario nocturno.
   4. Actividades que requiren un funcionamento nocturno de instalacións auxiliares, tales como cámaras frigoríficas, centros de transformación, instalacións de climatización, etc.
4. Nos edificios de uso mixto, nos que coexistan vivendas e outras actividades e en locais lindantes con edificios de vivenda, acentuaranse as medidas preventivas na concepción, deseño e montaxe de amortecedores de vibracións, sistemas de reducción de ruídos de impacto, instalacións de entubados, conductos de aire e transporte interior, especialmente se o chan do local emisor está constituído por un forxado; e dicir, se existen outras dependencias baixo este, como sotos, garaxes, etc.
   1. Todas as máquinas e instalacións e, en especial, as de actividades situadas en edificios de vivendas o lindantes a estes, instalaranse sen ancoraxes nin apoios directos ó chan, interpoñendo os amortecedores e outro tipo de elementos adecuados como bancadas con peso de 1,5 a 2,5 veces o da máquina, se fose preciso.
   2. En ningún caso poderanse ancorar nin apoiar máquinas en paredes nin piares. En teitos tan só se autoriza a suspensión mediante amortecedores de baixa frecuencia de pequenas unidades de aire acondicionado ou ventiladores de baixa frecuencia, que, en calquera caso, instalaranse por debaixo do illamento do teito. As máquinas distarán como mínimo 0,70 metros de paredes medianeiras.
   3. As conexións dos equipos de ventilación forzada e climatización, así como os doutras máquinas a conductos e entubados, realizaranse sempre mediante xuntas ou dispositivos elásticos. Os primeiros tramos de entubados e conductos e, se fora preciso, a totalidade da rede, soportarase mediante elementos elásticos para evitar a transmisión de ruídos e vibracións a través da estructura do edificio. Ó atravesar paredes os entubados e conductos farano sen incrustamentos e con montaxes elásticas de probada eficacia.
   4. Prohíbese a instalación de conductos entre o illamento do teito e a planta superior, ou entre os elementos dunha doble parede, así como a utilización destas cámaras acústicas como plenums de impulsión o retorno de aire acondicionado.
   5. Todos os equipos das instalacións de ventilación e climatización instalaranse no interior do local, non se permite a súa instalación en fachadas nin en patios. Así mesmo, os ventiladores da instalación de renovación de aire situaranse no interior do local e o suficientemente arredados da saída de aire, para garantir a atenuación dos niveis xerados polos equipos ata os límites permitidos no exterior. En caso necesario, proxectaranse nos conductos sistemas de insonorización eficaces antes da saída do aire ó exterior.
   6. Os/as titulares das citadas actividades están obrigados e adopta-las medidas de insonorización das súas fontes sonoras e de illamento acústico dos locais para cumprir en cada caso as prescricións establecidas, dispoñendo, de ser necesario, de sistemas de ventilación forzada de forma que poidan pecharse os ocos ou ventás existentes ou proxectadas.
   7. Non se permitirá a instalación en edificios con uso residencial de actividades industriais especialmente molestas polos ruídos que se xeran, tales como talleres de carpintería de aluminio ou de madeira, talleres de calderería, carpintería metálica e reparación de chapa de vehículos.

Artigo 12. Control municipal do cumprimento

1. A autoridade municipal non outorgará licencia de apertura das instalacións das actividades ou dos establecementos sometidos a esta ordenanza se os proxectos presentados polos/as interesados/as non se axustan ó disposto nela. Non se poderá iniciar a actividade ou pór en funcionamento as instalacións mentres non se acredite o cumprimento da normativa sobre contaminación acústica mediante comprobación practicada polos órganos inspectores do Concello ou mediante certificación expedida por empresa ou entidade homologada para estes fins e sen prexuízo do exercicio das facultades inspectoras que correspondan ó Concello.
2. Nas licencias e nas declaracións de incidencia ambiental sinalaranse as medidas correctoras e os controis que deberán cumprir as actividades e instalacións, indicarase expresamente que o incumprimento destas pode dar lugar á revocación daquelas licencias ou autorizacións.
3. Unha vez iniciada a actividade ou postas en funcionamento as instalacións, tamén poderán realizarse inspeccións para comprobar que as actividades ou instalacións cumpren a normativa. Como consecuencia destas inspeccións, poderán incoarse os correspondentes expedientes sancionadores ou ben acordar medidas correctoras ou de control. As comprobacións ás que se refire este parágrafo estarán rexidos polo disposto na lexislación ambiental de Galicia.

Artigo 13. Estudio do impacto acústico

Todas as obras, instalacións ou actividades que, de conformidade co disposto na normativa estatal básica sobre a materia e na Lei 1/1995, do 2 de xaneiro, de protección ambiental de Galicia, estean sometidas a un procedemento de avaliación de impacto ambiental ou de avaliación de efectos ambientais conterán un estudio acreditativo do seu impacto acústico, de acordo coas esixencias contidas no Capítulo III do Regulamento de protección contra a contaminación acústica, aprobado polo Decreto 150/1999, do 7 de maio. Na declaración que se dicte, que terá carácter vinculante, imporanse as medidas correctoras precisas.

Artigo 14. Medidas específicas para a industria

As actividades dedicadas a uso industrial, ademais do cumprimento das prescricións establecidas neste título con carácter xeral, adoptarán as medidas que se establecen a continuación. Senón é posible a eliminación ou reducción do nivel de ruído producido durante o proceso productivo, adoptaranse as medidas de protección persoal necesarias cando existan traballadores expostos a doses de ruído superiores ás establecidas na regulamentación vixente en materia de saúde laboral.

Artigo 15. Medidas específicas para establecementos públicos

1. Ós proxectos das actividades que implican funcionamento dentro do horario nocturno, que se especifican na táboa 4 do Manual de procedemento para a medición de ruídos e vibracións, axunto a esta ordenanza, esixiránselles un illamento acústico normalizado R mínimo entre a actividade e a vivenda lindante, de acordo co indicado na mencionada táboa. O acceso do público realizarase a través dun departamento estanco con absorción acústica e dobre porta. Exceptuarase desta esixencia ós bares, cafeterías, restaurantes e similares que non conten cun equipo de reproducción sonora, así como as panaderías e confiterías con obrador. Todas as actividades que implican funcionamento dentro do horario nocturno que se especifican na anteriormente citada táboa 4, ademais do cumprimento das prescricións establecidas neste título, con carácter xeral adoptarán as seguintes:
   • Instalación de chan flotante se o chan do establecemento se asenta sobre un forxado, dispoñendo libre o espacio inferior. Cando o chan do establecemento estea asentado sobre terreno firme, admitirase a desolarización do paramento horizontal dos verticais, especialmente dos piares.
   • Instalación de dobres paredes laterais flotantes e desolarizadas en todo o contorno do local.
   • Instalación dun teito acústico desconectado mecánicamente do forxado da planta inmediatamente superior.
   • Non se permite a instalación de conductos de aire ou calquera outro tipo de instalacións entre o falso teito acústico e o forxado superior, así como calquera perforación deste para instalar equipos de iluminación, megafonía, etc., deberase dispor por debaixo del o falso teito necesario para as instalacións.
   • Excepcionalmente, para bares, cafeterías, restaurantes e similares que non conten cun equipo de reproducción sonora, situados en zonas especiais nas que sexa desexable que o manter o acabado de determinados paramentos en función das características do contorno, poderá eximirse da esixencia de contar con dobre parede lateral flotante a algún dos paramentos verticais, sempre e cando se trate dun muro de pedra de suficiente espesor que garanta ampliamente o illamento acústico e se substitúa por outra medida complementaria de illamento non esixible.
   • Pola súas especiais características de funcionamento, os ximnasios, locais de aeróbic, escolas de danza e similares, aínda cando non impliquen funcionamento dentro do horario nocturno, deberán contar con chan flotante, dobres paredes flotantes e desolarizadas e teito acústico desconectado mecanicamente do forxado superior.
2. Para garantir a adecuada e eficaz defensa das e dos veciños ante actividades de probado e manifesto carácter molesto, con independencia do indicado con carácter xeral anteriormente, e sen prexuízo doutras certificacións ou comprobacións que se lle poidan esixir á propiedade ou ser realizadas pola Administración municipal, antes da concesión da licencia de posta en marcha das actividades que implican funcionamento dentro do horario nocturno que se especifican na táboa 4 do Manual de Procedementos adxunto, o Concello esixiralle á propiedade un certificado de illamento acústico conseguido entre a actividade e as vivendas lindantes co local. A dita certificación realizarase por empresas ou entidades homologadas. As medicións efectuaranse de acordo coas especificacións establecidas no Manual de procedemento para a medición de ruídos e vibracións, que se achega con esta ordenanza, deberanse acadar os valores mínimos de illamento acústico que se indican na táboa 4 dese manual. A valoración do illamento acústico realizarase empregando o nivel global dB(A) D_nTA da diferencia de niveis estandarizada D_nT = D + log T/T₀ segundo UNE-EN ISO 140-4. Exceptúaranse desta esixencia ós bares, cafeterías, restaurantes e similares que non conten con equipo de reproducción sonora.
3. Nos locais nos que a separación coa planta superior estea constituída por un forxado de madeira, e o uso previsto no edificio para a planta situada inmediatamente enriba do local sexa o residencial ou de vivenda, non se poderá instalar ningunha das actividades que implican funcionamento dentro do horario nocturno que se especifican na mencionada táboa 4 do Manual de Procedementos, exceptuando os bares, cafeterías, restaurantes e similares que non conten con equipo de reproducción sonora. Nos locais nos que a separación coa planta superior estea constituída por un forxado de formigón, e o uso previsto para a planta situada inmediatamente enriba do local sexa ou residencial ou de vivenda, non se poderán instalar discotecas, salas de festas, salas de baile, locais de exhibicións especiais e, en xeral, todo tipo de locais que impliquen actuacións en directo con música ou canto en vivo.

Artigo 16. Obrigas dos/as seus/súas titulares

1. Ademais de cumprir as condicións establecidas na licencia de actividade, os locais de distracción pública ou recreativa como bares, restaurantes, discotecas, salas de baile, cines, teatros e similares deberán respectar o horario de peche establecido legalmente.
2. Os/as titulares de establecementos serán responsables de velar, cos medios que sexan necesarios, para que os usuarios/as, ó entraren e saíren do local, non produzan molestias á veciñanza. No caso de que as súas recomendacións non sexan atendidas, deberán poñelo inmediatamente en coñecemento da Policía Municipal.
3. Todos os establecementos públicos que dispoñan de equipo musical de elevada potencia, independentemente doutras limitacións establecidas nesta ordenanza, non poderán superar niveis sonoros máximos de 90 dB (A) nin picos de 130 dB (A) en ningún punto ó que teñan acceso os/as clientes/as ou usuarios/as, salvo que no acceso do referido espacio se coloque o aviso seguinte: "A exposición prolongada ós niveis sonoros do interior poden producir lesións permanentes no oído". O aviso será perfectamente visible tanto pola súa dimensión como pola súa iluminación. Tales establecementos deberán cumprir rigurosamente o establecido no artigo 15 deste capítulo.
4. Os/as titulares de establecementos que permiten a consumición das bebidas que expenden fóra do establecemento e dos lugares autorizados, serán considerados responsables, por cooperación necesaria, das molestias que se puidesen producir, e como tal seralles de aplicación o réxime sancionador desta ordenanza.
5. Cando o público de actividades de ocio con licencia de espacios abertos produza uns niveis de ruído superiores ós permitidos, ou sobrepase o aforo máximo establecido na dita licencia, que deberá figurar nun cartel que estará colocado en lugar visible para o público, o titular do establecemento será responsable das molestias, e seralle de aplicación o réxime sancionador desta ordenanza.
6. Todos os proxectos dunha nova construcción de autoestradas, estradas e vías de acceso a núcleos urbanos ou remodelación dos xa existentes na actualidade, incluirán un estudio de impacto ambiental de ruído, que ha de conter, no seu caso, as medidas correctoras para realizar.
7. Así mesmo, todos os documentos de planeamento para os núcleos urbanos e urbanizables situados xunto a autoestradas, estradas ou vías de acceso a núcleos, a redacción dos cales se inicie con posterioridade á entrada en vigor desta norma, deben prever a inclusión de medidas para corrixir o impacto ambiental.

Artigo 17. Limitacións especiais

Naquelas zonas da cidade onde existan numerosos establecementos públicos e os niveis xerais de recepción externa producidos pola adición das múltiples actividades existentes e pola actividades das persoas que utilizan os ditos establecementos superen en máis de 15 dB (A) os niveis fixados no Manual de Procedemento para a medición de ruídos e vibracións, anexo a esta ordenanza, a Alcaldía poderá establecer limitacións máis restrictivas no uso das fontes sonoras por citados establecementos. Ademais, tamén como consecuencia da realización do mapa acústico da cidade, a Alcaldía poderá fixar limitacións máis restrictivas ás consideradas nesta ordenanza, como pode ser o establecemento nas ditas zonas de distancias mínimas entre locais con música; para isto establecerase un rexistro das actividades suxeitas a limitación xa existentes, ás que haberá de incorporar as novas que se vaian outorgando en aplicación da citada restricción.

Capítulo 3. Regulamentación do ruído de tráfico

Artigo 18. Condicións de circulación dos vehículos

Todo vehículo de tracción mecánica deberá manter en boas condicións de funcionamento o motor, a transmisión, a carrocería e as demais pezas deste capaces de producir ruídos, co fin de que o nivel sonoro emitido polo vehículo ó circular con motor en marcha non exceda os límites que establece a presente ordenanza.

Artigo 19. Prohibicións

Queda prohibido:

Primeiro. A circulación de vehículos a motor co chamado "escape libre" ou con silenciadores ineficaces, incompletos, inadecuados ou deteriorados.

Segundo. Forzar as marchas dos vehículos de motor producindo ruídos molestos como aceleracións innecesarias, forzar o motor en pendentes ou ir máis dunha persoa nun ciclomotor, cando non estea autorizado para iso.

Terceiro. O uso de bucinas ou calquera outro sinal acústico dentro do núcleo urbano, excepto en caso de inminente perigo de atropelo ou colisión; ou por seren servicios de urxencia (policía, bombeiros e ambulancias) ou de servicios privados para o auxilio urxente de persoas.

Cuarto. Sobrepasar os límites máximos admisibles para ruídos emitidos polos distintos vehículos a motor en circulación, que serán os establecidos polos regulamentos 41 e 51 anexos ó Acordo de Xenebra, do 20 de marzo de 1958, e decretos que os desenvolven (BOE do 18 de maio de 1982 e do 22 de xuño de 1983).

Artigo 20. Restriccións especiais

Nos casos nos que se afecte notoriamente á tranquilidade da poboación, o Concello poderá sinalar zonas ou vías de circulación restrinxidas para algunhas clases de vehículos a motor, coa prohibición de circular ou coa obriga de facelo baixo determinadas condicións en canto a horarios e velocidade. Para os efectos do establecido no parágrafo anterior, estas restriccións aplicaranse sempre nas zonas que soporten un nivel de ruído, debido ó trafico rodado, que acade valores de nivel continuo equivalente superiores a 55 dB (A) durante o período nocturno e 65 dB (A) durante o período diurno.

Artigo 21. Inspección e control

Para a inspección e control dos vehículos a motor, os servicios municipais competentes axustaranse ó establecido nos regulamentos 41 e 51 citados no artigo 18 desta ordenanza. A Policía Local, que con axuda de aparellos medidores comprobe que os vehículos sobrepasan os límites sinalados nos regulamentos mencionados, ou que, sen necesidade de medida crean, ó seu xuízo, que os sobrepasan notoriamente, denunciará ó conductor, ou subsidiariamente ó propietario, e indicaralle a súa obriga de presentar o vehículo na ITV da Delegación Provincial de Industria correspondente para o seu recoñecemento e inspección, retendo o permiso de circulación de acordo co previsto no bando en vigor, regulador da materia.

Capítulo 4. Actividades varias

Artigo 22. Regulación do ruído nos demais casos

A produción de ruídos e vibracións na vía pública e nas zonas de pública convivencia (prazas, parques, ribeiras, etc.) ou no interior dos edificios manterase dentro dos límites que establece o Manual de procedementos para a medición de ruídos e vibracións, anexo a esta ordenanza. Calquera outra actividade ou comportamento persoal ou colectivo non comprendido nos artigos precedentes, que produza unha perturbación da veciñanza por ruídos ou vibracións, evitable cunha conducta cívica normal, entenderase incursa no réxime sancionador desta ordenanza.

Artigo 23. Casos especiais

A limitación prevista no artigo anterior esixirase especialmente no caso de ruídos producidos en horas de descanso nocturno (22:00 a 8:00 horas). Por iso, establécense as seguintes prohibicións, sempre que superen os límites sinalados en cada caso:

1. O ton excesivamente alto da voz humana e a actividade directa das persoas (cantar, gritar, vociferar ou realizar traballos de reparación doméstica, bricolaxe, etc.)
2. Os sons producidos polos diversos animais domésticos.
3. O uso de aparellos ou instrumentos musicais (radio, televisión, etc.)
4. O uso de electrodomésticos.

Artigo 24. Grandes aglomeracións

As manifestacións populares na vía pública ou espacios abertos de carácter común ou veciñal, derivados da tradición; as concentracións de clubs ou asociacións; os actos culturais ou recreativos excepcionais, manifestacións ou mitins políticos ou sindicais e todos os que signifiquen grandes aglomeracións, deberán dispor da autorización expresa do Concello. Este poderá impor condicións en atención á posible incidencia por ruídos na vía pública, con independencia das cuestións de orde pública. A solicitude formularase coa mesma antelación cá lexislación sinala para solicitar autorización gobernativa.

Artigo 25. Traballos na vía pública e de edificación

1. Nos traballos realizados tanto na vía pública coma na edificación non se autoriza o emprego de maquinaria cun nivel de emisión externo (NEE) superior a 90 dB (A), medido na forma expresada no Manual de procedementos para a medición de ruídos e vibracións, anexo a esta ordenanza.
2. Os traballos realizados tanto na vía pública coma na edificación non poderán realizarse entre as 22:00 e as 8:00 horas do día seguinte, se producen niveis superiores ós establecidos no citado manual de procedementos, e que deben ter, en tal caso, a correspondente autorización.
3. Exceptúanse da prohibición anterior as obras urxentes, as que se realicen por razóns de necesidade ou perigo, e aquelas que, polos seus inconvenientes, non se poidan realizar durante o día. O traballo nocturno deberá ser expresamente autorizado ou ordenado polo Concello, o cal determinará os límites sonoros que deberán respectarse en función das circunstancias que concorran en cada caso.

Artigo 26. Carga e descarga

As actividades de carga e descarga de mercadorías, manipulacións de caixas, contedores, materiais de construcción e obxectos similares na vía pública, entre as 22:00 e as 8:00 horas do día seguinte poderán realizarse sempre que non superen os límites sonoros establecidos no mencionado Manual de Procedementos. É preceptiva autorización municipal expresa para aquelas actividades que xustifiquen tecnicamente a imposibilidade de respectar os límites establecidos. No horario restante da xornada laboral, realizaranse co máximo coidado a fin de minimizar as molestias e reducilas ás estrictamente necesarias.

Artigo 27. Limpeza das vías e recollida do lixo

O servicio público nocturno de limpeza e recollida de lixo adoptará as medidas e as precaucións necesarias para reducir ó mínimo o nivel de perturbación da tranquilidade cidadá. Nos pregos de condicións da contrata deste servicio especificaranse os valores límite de emisión sonora aplicables ós vehículos.

Artigo 28. Prohibición de dispositivos sonoros

Con carácter xeral, prohíbese o emprego de todo dispositivo sonoro con fins de propaganda, reclamo, aviso ou distracción. Exceptúanse desta prohibición os casos de alarma, urxencia ou especial significación cidadá, que poderán ser autorizados pola autoridade competente, trala petición fundada.

Artigo 29. Alarmas

1. De conformidade co artigo 23 ñ) da Lei orgánica 1/92, de protección da seguridade cidadá, considerarase infracción grave "a apertura dun establecemento, o inicio das súas actividades ou o desenvolvemento do seu funcionamento sen autorización ou sen adoptar total ou parcialmente as medidas de seguridade obrigatorias ou cando aquelas non funcione ou o fagan defectuosamente, ou antes de que a autoridade competente expresase a súa conformidade coas mesmas". Serán responsables os/as titulares dos establecementos obrigados a ter estas medidas de seguridade do seu correcto funcionamento.
2. Cando se trate de particulares ós que a normativa vixente non lles obriga a ter instaladas medidas de seguridade, e non obstante fan uso delas, de conformidade co artigo 24.2 da Lei 23/92, de seguridade privada, considerarase infracción leve: "A utilización de aparellos ou dispositivos de seguridade sen axustarse ás normas que os regulen, ou o seu funcionamento con danos e molestias para terceiros".
3. A instalación destas medidas de seguridade, e concretamente das alarmas, unicamente poderá efectuarse por empresas homologadas pola Dirección Xeral da Policía. Estas instalacións realizaranse co preceptivo contrato que debe ser presentado no Ministerio do Interior para o seu correspondente visado. A Lei de seguridade privada considera, no seu artigo 22.2 d, infracción grave a realización de servicios de seguridade sen formalizar ou sen comunicar ó Ministerio do Interior a realización dos correspondentes contratos.
4. Cando o anormal funcionamento dun sistema de alarma produza molestias á veciñanza e non sexa posible localizar ó responsable, comunicaráselle ó Corpo Nacional de Policía, para os efectos oportunos.
5. O control, vixilancia e sanción destas infraccións é competencia do Corpo Nacional de Policía, ó que se lle comunicará calquera denuncia ou incumprimento nesta materia.